«Электрондық қаржы орталығы» АҚ Қазақстандық тауар өндірушілердің тізілімін таныстырды

Электрондық қаржы орталығы» АҚ алаңында Қазақстан Республикасының Өнеркәсіп және құрылыс министрі Ерсайын Нағаспаевқа арналған «Қазақстандық тауар өндірушілердің тізілімі» ақпараттық жүйесінің таныстырылымы өтті.

Іс-шараға Қаржы вице-министрі Әсет Тұрысов, Өнеркәсіп және құрылыс вице-министрі Олжас Сапарбеков, «ЭҚО» АҚ Басқарма төрағасы Дияс Крамшеев және «QazIndustry» ҚИЭО АҚ Басқарма төрағасы Берик Бекенов қатысты.

Таныстырылым аясында «ЭҚО» АҚ мамандары кәсіпорынның өтінім беруінен бастап тізілімге енгізуге дейінгі жүйенің жұмысын көрсетті. Тауарлардың шығарылған елін айқындаудың ашықтығын арттыруға және отандық өндірушілерге деген сенімді нығайтуға бағытталған цифрлық верификацияға ерекше назар аударылды.

Платформаны құру бойынша жұмыс жоспарлы тәртіппен және бекітілген кестеге сәйкес жүргізіледі.

 Ерсайын Нағаспаев жүргізіліп жатқан жұмыстарға оң баға беріп, тізілімді енгізу кәсіпкерлікті мемлекеттік қолдаудың тиімділігін арттыруға және отандық тауар өндірушілердің мүдделерін қорғауды күшейтуге ықпал ететінін атап өтті.

«Қазақстандық тауар өндірушілердің тізілімі» ақпараттық жүйесін іске қосу ағымдағы жылға жоспарланғанын естеріңізге сала кетейік. Оны енгізуді көздейтін заң жобасын Мәжіліс пен ҚР Парламенті Сенаты мақұлдады.

Тізілімді құру отандық өндірушінің мәртебесін растау рәсімін жеңілдетуге, әкімшілік және қаржылық кедергілерді қысқартуға, сондай-ақ мемлекеттік дерекқорлармен интеграциялау арқасында-процестерді автоматтандыруға және шешім қабылдау кезінде адами факторды азайтуға мүмкіндік береді.