Крамшеев Дияс Казбекович «Электрондық қаржы орталығы» АҚ Басқарма төрағасы болып тағайындалды

Директорлар кеңесінің 2024 жылғы 3 маусымдағы шешімімен «Электрондық қаржы орталығы» АҚ Басқарма Төрағасы қызметіне Дияс Қазбекұлы Крамшеев тағайындалды.

Қазақстан Республикасының Қаржы вице-министрі Әсет Нұрланұлы Тұрысовтың төрағалығымен өткен Директорлар кеңесінің күндізгі отырысының қорытындысы бойынша Қоғам ұжымына жаңадан тағайындалған Басқарма Төрағасы таныстырылды.

Дияс Қазбекұлы Крамшеев 1989 жылы Қызылорда облысы Байқоңыр қаласында дүниеге келген. Мәскеу авиациялық институтын (Ұлттық зерттеу университеті) «Ақпаратты өңдеу және басқарудың автоматтандырылған жүйелері» мамандығы бойынша бітірген.

Еңбек жолын 2012 жылы «Ұлттық ақпараттық технологиялар» АҚ сарапшысы ретінде бастап, 2017 жылға дейінгі кезеңде әртүрлі лауазымдарда жұмыс атқарды. 2016–2017 ж.ж. «Ұлттық ақпараттық технологиялар» АҚ Департамент директоры болып тағайындалды. 2017-2019 жылдары Ақпараттық технологияларды дамыту Департаменті директорының орынбасары және «Азаматтарға арналған үкімет» МК» КЕАҚ Цифрландыру жөніндегі офис жобасының жетекшісі болды. 2019–2020ж. ж. – «Ұлттық ақпараттық технологиялар» АҚ Департамент директоры, 2020-2021 жылдары – «Ұлттық ақпараттық технологиялар» АҚ Басқарма Төрағасының орынбасары. Тағайындалғанға дейін «Bereke Bank» АҚ Басқарушы директоры болды.

Сонымен қатар, Директорлар кеңесінің төрағасы бұл тағайындауды Қоғамды дамыту мен нығайтудың маңызды стратегиялық қадамы ретінде атап өтті.

Өз кезегінде Басқарма төрағасы көрсеткен сенім үшін алғысын білдіріп, Қоғам алдына қойылған міндеттерді іске асыруға дайын екенін жеткізді.