Электрондық қаржы орталығында тәжікстандық делегаттарға тың жобалар таныстырылды
Тәжікстан Республикасы Қаржы министрінің бірінші орынбасары Ю.Х.Маджиди Қазақстанға жасаған іссапары кезінде «Электрондық қаржы орталығы» АҚ болып, еліміздің мемлекеттік қаржы жүйесін цифрлы трансформациялауға арналған негізгі жобалармен танысуға мүмкіндік алды.
Атап айтқанда, мәртебелі меймандарға Қазақстандағы бюджеттік жоспарлау процесін оңтайландыруға бағытталған Мемлекеттік жоспарлаудың ақпараттық жүйесі, мемлекеттік ресурстарды тиімді, ашық және тиісті есеппен қамтамасыз ететін Бірыңғай сатып алу платформасы, сондай-ақ жүйе пайдаланушылары мен барлық коммуникациялық арнаны бір терезеде біріктіретін Қаржы министрлігінің бірыңғай байланыс орталығы таныстырылды.
Бұл кездесу Қазақстан мен Тәжікстанның Қаржы министрліктері арасындағы 2024-2025 жылдарға арналған өзара әрекеттесу іс-шараларының жоспары аясында өткізілгенін айта кетейік. Осыған сәйкес екі елдің ведомстволары арасында мемлекеттік қаржы саласы мен бюджетті басқару ісінде, сондай-ақ мемлекеттік сатып алу, аудит, салықтық әкімшілендіру, қаржы жұйесін цифрландыру және т.б. бағыттарда тәжірибе алысып, екіжақты тиімді ынтымақтастықты дамыту көзделген.
Осы ретте ТР Қаржы министрінің бірінші орынбасары Ю.Х. Маджиди бастаған Тәжікстан Республикасының Қаржы және білім министрліктері делегациясының еліміздегі сапары 11-13 қыркүйекке дейін жалғасатынын айта кетейік.