ҚР Мәжіліс депутаттары мемлекеттік сатып алудағы инновациялық шешімдермен танысу үшін «Электрондық қаржы орталығы» АҚ кеңсесіне барды

Бүгін, 2024 жылғы 30 қаңтарда «Мемлекеттік сатып алу» туралы жаңа заң жобасын әзірлеу жөніндегі жұмыс тобына белсенді қатысып жатқан депутаттар тобы «Электрондық қаржы орталығы» акционерлік қоғамының кеңсесіне сапармен келді.

«Электрондық қаржы орталығы» АҚ бизнес, қоғам және мемлекет мүдделерінің балансын сақтауға бағытталған мемлекеттік қаржы саласындағы инновациялық шешімдерді құруда және дамытуда көшбасшы болып табылады.

Сапар аясында таныстырылым өтіп, барысында Мәжіліс депутаттары «Электрондық қаржы орталығы» АҚ порталының егжей-тегжейлі жұмысымен және жүйелілігімен танысты. Портал жұмысының қазіргі заманғы мемлекеттік процестер үшін тиімділігі мен маңыздылығын атап өтетін статистика көрсетілді.

Аталған сапар мемлекеттік сатып алу және қаржылық басқару саласында заманауи технологияларды пайдаланудың артықшылықтарын түсінудегі негізгі қадам болды. Бұл мемлекеттік құрылымдар қызметінің айқындығы мен тиімділігін арттыруға ықпал етеді.

«Электрондық қаржы орталығы» АҚ қаржылық реттеу және сатып алу саласындағы заманауи шешімдерге қызығушылық танытқаны және ашықтығы үшін депутаттарға алғыс білдіреді.