Электрондық қаржы орталығының ұжымы ұлы Абайды ұлықтады

Қазақтың бас ақыны Абай Құнанбайұлының туған күніне орай Электрондық қаржы орталығының бастамасымен ауқымды іс-шара өткізілді.

Екі жүзден аса адамның басын қосқан жиынға акционерлік қоғамның өңірлерде жұмыс істейтін қызметкерлері де қатысу мүмкіндігіне ие болды. Кейінгі ұрпаққа ұлағатты мұра қалдырған ұлы хакімнің шығармашылығын дәріптеуге арналған басқосуды «Электрондық қаржы орталығы» АҚ Басқарма төрағасы Дияс Крамшеев ашып, ұйым басшысы бұл күнді атап өтудің мән-маңыздылығына айрықша тоқталды.

«Абай - білім мен ағартудың, ар-ұят сынды асыл құндылықтардың символындай. Кемеңгер ойшылдың еңбектері өміршеңдігімен бағалы. Оның шығармалары әлі талай буынға азық болатыны күмәнсіз», деді Басқарма төрағасы.

Мемлекеттік тілдің мәртебесін арттыру және халқымыздың ұлттық құндылықтарын насихаттауға арналған іс-шараның бағдарламасы мазмұнды болды. Айталық, Абайдың өміріне қатысты қызықты деректер келтіріліп, қатысушылар ұлы ақынның өлеңдерін мәнерлеп оқу арқылы өзара сынға түсті. Бұдан кейін домбыраны қолға алған Қоғам қызметкері Мәди Қызайбай халық күйлерін орындап, көпшіліктің ықыласына бөленді.

Сондай-ақ ұйымның тағы бір өнерлі өкілдері Тенел Тоқмырзаев пен Толғанай Жетпісбекова Абайдың сөзіне жазылған әндерді шырқап, рухани кештің ажарын аша түсті.

Алаш халқының ары мен ұстанымына айналған ұлы ойшылдың құрметіне арналып өткізілген іс-шараның соңында үздік өнер көрсеткен азаматтарға алғыс хаттар мен арнайы сыйлықтар табысталды.