«Электрондық қаржы орталығы» АҚ БҰҰ ЭСКАТО-ның Цифрлы инклюзия және трансформация жөніндегі Азия-Тынық мұхиты конференциясы аясында өткізілген Kazakhstan Tech Solution Day іс-шарасында бірқатар тың жобаны таныстырды
Озық технологиялар мен олардың орнықты дамудағы маңыздылығына арналған жиында Электрондық қаржы орталығының мамандары мемлекеттік қаржы жүйесін жаңғыртып, басқару процесінің тиімділігін арттыратын бірнеше өнімді көпшіліктің назарына ұсынды. Атап айтқанда:
- Мемлекеттік жоспарлаудың ақпараттық жүйесі – бюджеттік жоспарлауды автоматтандырып, ақпараттық сүйемелдеу бойынша ықпал зор. Оның артықшылығы бюджет қаражатын тиімді бөлуді арттырып, тиісті процестің ашықтығын қамтамасыз етеді.
- Бірыңғай сатып алу платформасы – мемлекеттік органдардың, квазимемлекеттік сектор субъектілерінің және басқа да алаңдардың сатып алу процестерін біріктіріп, қолданушылардың ыңғайлылығын үшін мониторинг пен бақылауды қамтамасыз ететін жүйе.
- Электронды тауарлар каталогы – техникалық ерекшеліктерді автоматты түрде қалыптастырып, бұрынғы бағаларды талдау мен тауар айналымын бақылауға мүмкіндік беретін деректерді сақтап, басқаруға арналған жүйе.
- Онлайн бюджеттік мониторинг – камералды бақылауды жүргізуге, бюджет қаражатын тиімсіз игерілу тәуекелдерінің алдын алуға және қаржылық бұзушылықтарды азайтуға мүмкіндік береді.
- Қаржы министрлігінің Бірыңғай байланыс орталығы – азаматтармен кері байланысты жақсарту мақсатында ведомствоның ақпарат жүйелерінің коммуникациялық арналарын біріктіретін жоба.
«Электрондық қаржы орталығы» АҚ басқарма төрағасы Дияс Крамшеев айтқандай, Қазақстан цифрландыру саласында біраз жетістікке жетіп, көшбасшы елдердің қатарынан көрініп келеді. «Мемлекеттік қаржы жүйесін цифрлы трансформациялау осы үдерістің негізгі элементі болып саналады. Жоғарыда аталған жобаларды енгізу мемлекеттік қаржыны басқару процесінің тиімділігін нығайтып, ашықтықты қамтамасыз етумен бірге азаматтардың сенімін арттырады», деді ұйым басшысы.
Бұл орайда БҰҰ ЭСКАТО-ның Азия-Тынық мұхиты конференциясы цифрландыру мен IT саласына жауапты министрлерді, халықаралық ұйымдарды, жеке сектор мен азаматтық қауымдастықтың өкілдерін қоса алғанда, 50-ден астам елдің делегацияларын біріктіретінін айта кетейік. Оның негізгі мақсаты – орнықты даму көрсеткіштеріне қол жеткізу арқылы өңірдегі барлық елге цифрлы ресурстарға тең қолжетімділікті қамтамасыз ету, сондай-ақ цифрлы технологиялар саласындағы ынтымақтастықты дамыту.