«Электрондық қаржы орталығы» АҚ-да Қазақстан мен Сербияның Қаржы министрліктерінің өкілдері кездесті

Шетелдік делегация елімізге екі мемлекеттің қазынашылық органдары арасында тәжірибе алысу мақсатындағы сапармен келді.

Кездесу барысында ҚР ҚМ Қазынашылық комитеті отандық қазынашылық қызметті ұйымдастыру ісін, сондай-ақ салалық ақпарат жүйелерінің (ҚК АЖ) жұмысын көрсетті. Бұл орайда Электрондық қаржы орталығы ҚК АЖ жүргізіп, әкімшілендіру міндетін жүзеге асыратынын айта кетейік. Айталық, тараптар озық ақпараттық технологияларды қолдану арқылы мемлекеттік қазынашылық қызметті жақсартуға арналған заманауи үрдістерді қарастырды. Мәселен, сербиялық қазынашылар ISKRA еңбекақы төлеу қорының орталықтандырылған жүйесін таныстырды.

Аталған кездесу Қазақстан мен Сербияның Қаржы министрліктері арасында 2024-2025 жылдарға арналған өзара іс-қимыл жоспары шеңберінде өткенін атап өткен жөн. Соған сәйкес мемлекеттік қаржы мен бюджетті басқару, мемлекеттік сатып алу, аудит, салықтық әкімшілендіру және рәсімдерді цифрландыру бағытында тәжірибе алысып, өзара тиімді қарым-қатынасты дамыту қарастырылған.