Қазақстандық IT-мамандар Тәжікстанға электрондық мемлекеттік сатып алуды енгізді

14 наурызда Астанада Тәжікстан Республикасының Президенті Э.Рахмонның Қазақстанға сапары барысында келісімге қол қою жүзеге асты.

ҚР Қаржы министрі Бақыт Сұлтанов және Тәжікстан Республикасының Үкіметі жанындағы тауарлар, жұмыс және қызметтерді мемлекеттік сатып алу Агенттігінің директоры Бахриддин Сироджиддинзода Меморандумға қол қойды.

Құжат электронды мемлекеттік сатып алулар жүйесін дамытуда білім, ақпарат, және тәжірибе алмасуды көздейді. Сондай-ақ, ол мемлекеттік сатып алулар саласында қордаланып қалған мәселелерді шешуде, осы саладағы озық тәжірибелерді пайдалануға мүмкіндік береді. Меморандум аясында уәкілетті тараптар мемлекеттік сатып алуға қатысушылардың біліктіліктілігін арттыру бағытында бірлесе жұмыс істейді. ҚР Қаржы министрлігінің мамандары Тәжікстан тарапынан мемлекеттік сатып алулар саласындағы заңнаманы жетілдіру мәселелері бойынша кеңес беруге тартылмақ.

Қазіргі таңда қос елдің арасында аталған салада жүргізілген бірлескен жұмыстың сәтті тәжірибесі бар.

ҚР Қаржы министрлігінің ведомстволық бағынышты мекемесі - «Электрондық коммерция орталығы» АҚ «Тәжікстан Республикасының электронды мемлекеттік сатып алулары» (Сомасы 100 млн. астам теңгені құрайтын) ақпараттық жүйесін дамытуда кеңес көрсету қызметі бойынша Дүниежүзілік Банк жобасын жүзеге асыру үшін әлемнің дамыған 50 елінің арасында өткізілген байқауды жеңіп алды. Аталған жоба мемлекеттік қажеттіліктер үшін сатып алулар процедураларын толықтай автоматтандыруға бағытталды.

Жоба 2017 жылы жүзеге асырылды. Аталған ақпараттық жүйе дамытылып ғана қоймай, сонымен қатар, Тәжікстан Республикасы Қаржы министрлігінің қазынашылық орталығы және Ұлттық Банкінің жұмысына икемделді. Бұдан басқа, Агенттіктің мемлекеттік сатып алулармен айналысатын техникалық қызметкерлері мен мамандарына арналған біліктілікті жетілдіру жұмыстары жүргізілді.

«Тәжікстан Республикасының электронды мемлекеттік сатып алулары» ақпараттық жүйесін дамыту жобасы «Электрондық коммерция орталығы» АҚ-ның осы бағыттағы алғашқы халықаралық тәжірибесі. Орталық мамандарының біліктілігі Дүниежүзілік Банктің сарапшыларымен жоғары бағаланды.