ҚР Премьер-министрі Электрондық қаржы орталығының цифрлы инфрақұрылымымен танысты

Қазақстан Премьер-министрі Олжас Бектенов «Электрондық қаржы орталығы» АҚ болып, салық реформасын түсіндіру жұмыстарының барысын бағалап, ведомствоның технологиялық мүмкіндіктерін пысықтады.

Оның барысында мемлекеттің салық төлеушілермен өзара іс-қимылының «бірінші желісі» болып саналатын Бірыңғай байланыс орталығының жұмысы таныстырылды. Консультациялар үш деңгейлі жүйе бойынша жүргізіледі: қарапайым түсіндіруден бастап ауқымды техникалық қолдауға дейін.

Айталық, қаңтардан бастап 135,5 мыңға жуық өтініш өңделді. Тегін «1414» байланыс желісі, мессенджерлер мен жасанды интеллект негізіндегі чат-боттардың жұмысы жолға қойылды. Күн сайын операторлар 13-14 мың қоңырау қабылдап, оның жартысына жуығы салық жаңашылдықтары мен әлеуметтік төлемдерге қатысты.

Үкімет басшысы айтқандай, ЭҚО-ның міндеті – «шиеленіссіз фискалды транзитті» қамтамасыз ету мен бизнеспен қарым-қатынастың сервистік моделін құру.

«Біз бизнестің «Әділ Қазақстан» қағидаттарына бейімделіп жатқанын көріп отырмыз. Мәселен, 2025 жылы кәсіпкерлер өз еркімен 750 млрд теңгеден астам салық аударған. Бұл салық мәдениеті мен патриотизмнің артқанын айғақтайды», – деді Олжас Абайұлы. Кейбір азаматтардың пікіріне қарамастан, статистика іскерлік белсенділіктің өскенін көрсетіп отыр: 2025 жылы 480 мың жаңа заңды тұлға тіркелді. Ал 2026 жылдың алғашқы 20 күнінде тағы 22 мың заңды тұлға тіркелген.

Консультациялық қолдаудан бөлек, Электрондық қаржы орталығы 21 ақпараттық жүйенің үздіксіз жұмысын қамтамасыз етіп келеді. Оның ішінде:

Бюджеттік процестің интеграторы;
Мемлекеттік сатып алу порталы;
Фискалды саясат жүйелері бар.

Қазір ЭҚО-ның барлық бөлімшесі ақпараттық қауіпсіздік пен деректерді жеделдігін өңдеуге мүмкіндік беретін жаңа технологиялық ғимаратта шоғырланған.

Премьер-министр Қаржы министрлігіне орталықты технологиялық тұрғыдан жаңғыртуды жалғастырып, әр азамат пен кәсіпкер қысқа мерзімде сапалы көмек ала алатындай Байланыс орталығының қуатын кеңейтуді тапсырды.